NOVO CURSO 2023-2024

Iniciamos o curso 2023-2024 co desexo de ter un ano favorábel para todas e todos, e para a nosa lingua. O Equipo de Dinamización saúdavos e agárdavos durante o curso nas súas actividades, e se tedes algunha suxestión que facer, aquí estamos para escoitarvos e, de ser posíbel, levar a cabo. 

E para que vaiades planificando o voso día a día, aquí vos deixamos o Calendario escolar, con celas amplas para que poidades ocupar con notas. Este ano a música galega é a protagonista. Grupos ou solistas cun anaco da súa música. Non todas as músicas aparecen, xa que son dez os meses que nos ocupan; mais non por iso deixemos de escoitar ao resto. Temos a Fillas de Cassandra, Loita Amada, Lontreira, Kike Varela, Mondra, MJPérez, A banda da Loba, The Skárnivals, Monoulious Dop ou Sés. Bótalle un oído, non te vas arrepentir!!!

Calendario Feireando aquí

Calendario "planetario" aquí 

 

Ah! O comezo de curso será de maneira escalonada: Indicacións

 

IMOS ALÓ! FORZA!

NOVO CURSO 2022-2023

 Tras a parada estival, voltamos con enerxía para afrontar este novo curso, máis claro e sen tantas restricións como viñemos padecendo. O Equipo de Dinamización desexa que a partir de agora poidamos vernos ben, con boa saúde e sen obstáculos víricos.

  COMEZAMOS!!  E facémolo, como cada ano, publicando o calendario escolar deste novo curso, que podes descargar en calquera tamaño. Aconsellámosche o A3 para poder ter máis espazo que cubrir se o levas a un taboleiro; se  non, cun A4 chégache. 

Este curso dedicámolo aos peixes e mariscos; algúns nomes galegos que teñen diferenza co castelán. Se vas ao mercado, non esquezas pedir en galego! 

  Moito ánimo e forza, compañeiras e compañeiros!! Vémonos polos corredores, no patio, nas aulas...😍💪

Descarga aquí o calendario pagán (feireamos).

Descarga aquí o calendario cristián.

CONCURSO TARXETAS DE NADAL

Achegámonos ao mes de nadal, e o Equipo de Dinamización, un ano máis, vén a convocar o concurso de postais de nadal, dirixido a todo o alumnado de Secundaria e Bacharelato do IES A Xunqueira II. Consulta as bases aquí e anímate a participar con toda a túa imaxinación, creatividade e sentimento natalicio.

Lembra que só podes facer o teu deseño nunha cara  da postal, pois se resulta vencedora será a imaxe oficial da postal de nadal do noso instituto.

Participa!!! 

 

BANDO DE DON XUNCÓN'21 - MARTES 09.02.21

 

DE PUÑO E PINCEL

  Co gallo da conmemoración do nacemento da grande poeta galega, Rosalía de Castro, o Equipo de Dinamización Lingüística do IES A Xunqueira II convoca o I Certame Escolar "De puño e pincel".

Consiste en ter como modelo a seguir a obra "O puño e a letra", de Yolanda Castaño, na editorial Xerais (existencias na biblioteca, en Debuxo e na coordinadora do EDL). A temática ten que xirar ao redor de algún poema de Rosalía presente en Cantares Gallegos ou Follas Novas. -Non ten por que estar presente todo o texto poético elixido; bastaría con algúns versos-.

Colle o teu pincel e particípa neste concurso realizado polo Equipo de Dinamización, coa colaboración do Departamento de Debuxo. Amosa a túa vea artística!

Podes ler aquí as bases do concurso.

CONCURSO POSTAIS DE NADAL

 

Coma todos os anos, coa chegada do nadal e fin de trimestre, convócase para todo o alumnado do noso centro un concurso de postais de nadal, onde o principal obxectivo é a activación da súa creatividade. Estabelecéronse dúas categorías de participación: unha para os tres primeiros cursos da ESO e a outra para os restantes (dende 4ºESO até 2ºBACH).

Unha vez recibidas as tarxetas participantes, expuxéronse todas na entrada do instituto e coas gañadoras creouse a postal de nadal do centro.

 

Na primeira categoría foi a realizada por Lucía Abollado Bugallo, de 1ºESO, a gañadora. A súa orixinalidade, técnica e personalidade foi a que convenceu ao xuri do concurso:

 

E na segunda categoría resultou gañadora a creada por Ángela Medina Dacasa, de 1ºBACH, achegando non só un deseño, senón tamén un poema creado.

Ademais, levaron accésit outras creacións. Podes ver todas as postais aquí.

 

 

SAÚDO

 👋O Equipo de Dinamización Lingüística do IES A Xunqueira II comeza a súa andaina polo mundo blogger. Nunca é tarde, dita o refrán. Pois velaquí chegamos con ganas de amosarche todo o que facemos, o que pensamos, o que vemos e o que sabemos.

Nacemos nun ano un tanto especial, continuando coas restriccións da pandemia Covid e con moito desexo de que todo volva á normalidade social da que vimos afeitas.

O obxectivo principal do Equipo é poder desenvolver unha vida en galego, o máis motivadora posíbel, e que ti tamén o fagas. 

Así que, amiga, amigo, imos aló con todo isto. E lembra, se pertences ao IES A Xunqueira II e queres formar parte do Equipo de Dinamización, tes as portas abertas. 

Forza e alegría!💪😄