PORTA DECORADA DE ENTROIDO PREMIADA

 Foron diversos os motivos polos que o xuri do Equipo de Dinamización non se puido xuntar para debater sobre a porta entroideira vencedora, mas o bo sempre chega, aínda que con demora.

  Este primeiro ano foron poucos os grupos que decidiron decorar a porta da aula con motivo do Entroido. Entendemos que a maioría o fixo por algunha razón como a presenza de exames e/ou traballos ou unha carga grande de tarefas. Sexa como for, convidámosvos a que no próximo ano presentedes os vosos decorados.

 Velaquí as portas presentadas. Son poucas, pero de calidade e moi detallistas. Parabéns aos tres grupos, todos eles da Categoría 1. 

Foi difícil a decisión para o xuri, mais ao final a porta vencedora foi a de 3ºPMAR. Felicidades!!! 💐🎁🎉🎉🎉

PREMIADA ENTROIDO'2021

POR ORDE DE DON XUNCÓN'21...

 Achégase o entroido, a data máis festiva e trouleira da cultura galega. Tempo de máscaras, risos e "liberdade". Nestas datas parece que perden a súa vixencia os valores e normas do resto do ano, todo está permitido; chegan as sátiras e caricaturas de persoas e acontecementos célebres; un  momento de liberarnos de forma lúdica das frustracións do ano. 

Deste xeito, desaparecen as categorías sociais, todos somos iguais, todos somos máscaras. A personalidade que cada un/ha ten de seu queda na casa e a máscara representa un papel.

 

Por iso, o Equipo de Dinamización do Xunqueira II enceta unha nova actividade para non permitir que a monotonía, e a tristura, destes momentos que estamos a vivir, se apodere das nosas vidas. Trátase de darlle vida a Don Xuncón'21, o excelentísimo e insigne señor, quen nos dará, previamente ao día, unhas instrucións de como achegarnos, voluntariamente, ao centro cada día da segunda semana de febreiro. 

Que? Anímaste?  

Agarda ao venres 5 de febreiro para coñecer a súa ordenanza do día 8.