OBRADOIRO MICOLÓXICO

 Este mes de novembro, o alumnado de 1ºESO desprazouse xunto co profesorado de Bioloxía e persoal da asociación micolóxica Brincabois, ao exterior para procurar todos os cogumelos que atopasen e posteriormente poder clasificalos e analizalos. Moito se aprendeu deles e, sobre todo, coa lección impartida polos profesionais. Posteriormente a unha breve exposición na entrada do noso centro, foron devoltos ao seu hábitat para que os mesmos fungos se descompoñan polos organismos descompoñedores, tipo insectos, lesmas e outros animaliños e tamén para que desprendan as esporas que queden neles para dar lugar a outros.

Esta actividade foi dirixida polo Equipo de Dinamización e o Servizo de Normalización do Concello de Pontevedra, e coordinada polo Departamento de Bioloxía.

 

APRENDEMOS A REGUEIFAR

Os cursos de 2ºESO aprenderon a regueifar da man de profesionais deste xeito de lidar entre as amizades. Unha hora e media de diversión e cante ben rimado, onde aprendemos e rematamos ben contentos e encantados con esta xentiña que tanto sabía.

Agora tan só falta que algúns dos rapaces e rapazas que alí improvisaron continúen coa vocación.

Ademais, alumnado de Literatura Galega do s.XX viñeron regueifar tamén con estes grupos. Moi ben feito!

OBRADOIRO CULTURA POP con @Olaxonmario

 Durante a mañá do día 18 de novembro, Mario Brión, máis coñecido no mundo youtubeiro como @Olaxonmario, estivo no noso instituto a falar co alumnado de 4ºESO sobre o mundo da cultura Pop en Galiza. Descubrimos voces novas no mundo musical e das redes sociais, ademais doutras xa vellas. 

Agradecémoslle a súa presenza e exposición tan amena. Tamén, grazas ao Servizo de Normalización do Concello de Pontevedra por brindarnos a oportunidade de telo connosco un ano máis. 

 

 

CONCURSO TARXETAS DE NADAL

Achegámonos ao mes de nadal, e o Equipo de Dinamización, un ano máis, vén a convocar o concurso de postais de nadal, dirixido a todo o alumnado de Secundaria e Bacharelato do IES A Xunqueira II. Consulta as bases aquí e anímate a participar con toda a túa imaxinación, creatividade e sentimento natalicio.

Lembra que só podes facer o teu deseño nunha cara  da postal, pois se resulta vencedora será a imaxe oficial da postal de nadal do noso instituto.

Participa!!! 

 

SAMAÍN 2021

 Vén de rematar a noite do Samaín, fin do verán e comezo do novo ano celta e dun novo ciclo agrícola; a etapa escura. Neses días de transición, os espíritos dos mortos andarían entre os vivos, mellor ou peor recibidos. E desa crenza precisamente derivan moitos dos ritos que se manteñen aínda hoxe.

 Tomando como modelo esta data, o alumnado de 1º ESO do IES  A Xunqueira II (e algunhas profes), coa colaboración fantástica do Departamento de Debuxo, deseñou as súas lápidas xunto cun epitafio pouco habitual e cheo de comicidade, para darlle alegría á "perda". Ademais, baixo landras🌳 ou castañas🌰, deron conta de refráns ou historias relacionadas co outono, co magosto ou co mesmo Samaín. Botácheslle un ollo? 

  Aquí tedes a proba de todos. Agardamos que vos guste! 👻💀 

 

         

NOVO CURSO 2021-2022

 O Equipo de Dinamización Lingüística do IES A Xunqueira II dá a benvida a este novo curso escolar, con pequenos novos cambios neste camiño de pandemia que vimos e seguimos a percorrer. Desexamos que todo vaia ben e poidamos ter unha normalidade onde poder ver os nosos sorrisos a través da boca, principalmente.

E para iniciar esta nova etapa volvemos a deseñar o calendario escolar até o mes de xuño, que podes descargar. 

  Este ano dedicamos os meses ás herbas de San Xoán, onde cada unha delas achega as súas características. Que sexan quen de pór maxia na nosa ruta!

Agardamos que vos guste.

Podes descargalo aquí. 

 

 

PREMIOS CERTAME LETRAS GALEGAS

 Despois da celebración das Letras Galegas 2021 en homenaxe a Xela Arias, o xuri do Equipo de Dinamización Lingüística do IES A Xunqueira II resolveu conceder premio na Categoría B, alumnado de 4º de ESO e Bacharelato, quedando a Categoría A deserta por falta de textos e non seguimento das bases. Así, a alumna María, de 1ºBach, resultou a gañadora deste certame co poema Sen dereito:

Non me leves

nin regreses.

Non me toques

nin me sopres.

Se non o fixeches

foi porque non quixeches.

Non me fales

nin me mires

Non me culpes se o que dis non o entendes.

Teño razóns para non falar.

Teño razóns para estar no ar.

Teño feitizos para enganar, 

teño feitizos para namorar.

Se non tes conciencia

é porque non quixeches

Se non a tes é por non saber

Non me mires con ollos penosos

que ben sabes a verdade

Non me fales con labios teimosos

que ben me respondes.

Non son nin a túa criada

nin túa nai.

Non son nin a túa esperanza

nin o teu desacougo

Son un ser que non ten dereito a ser tratado así

e ten a ilusión de chegar ao seu destino axiña.

PARABÉNS POLO BO FACER!!!